ரஷ்யா–உக்ரைன் போர்: ஒரேஷ்னிக் ஏவுகணை தாக்குதலால் இரு நாடுகளிடையே பதற்றம்!

2024 நவம்பர் மாதத்தில் உக்ரைனில் உள்ள ஒரு ராணுவ தொழிற்சாலையை குறிவைத்து ஒரேஷ்னிக் ஏவுகணை பயன்படுத்தப்பட்டபோது, அதில் உண்மையான வெடிகுண்டுகள் இல்லாமல் போலி குண்டுகள் மட்டுமே இருந்ததாக உக்ரைன் தரப்பு தெரிவித்திருந்தது.

கடந்த மாதம் உக்ரைன் தரப்பில் இருந்து ஜனாதிபதி விளாடிமிர் புதினின் இல்லங்களில் ஒன்றை குறிவைத்து ட்ரோன் தாக்குதல் நடத்த முயற்சி செய்யப்பட்டதாக ரஷ்யா குற்றம்சாட்டிய நிலையில், அதற்குப் பதிலடியாக உக்ரைனில் உள்ள ஒரு முக்கிய இலக்கை நோக்கி தங்களின் அதிவேக ‘ஒரேஷ்னிக்’ ஏவுகணையை ஏவியதாக ரஷ்ய ராணுவம் அறிவித்துள்ளது.

ஆனால், இந்த குற்றச்சாட்டை உக்ரைன் அரசு முழுமையாக மறுத்து, அது பொய்யான தகவல் என்றும் அமைதி பேச்சுவார்த்தைகளை பாதிக்க வேண்டுமென்ற நோக்கில் பரப்பப்படும் குற்றச்சாட்டு என்றும் தெரிவித்துள்ளது. இடைநிலை தூரம் கொண்ட ஒரேஷ்னிக் ஏவுகணை பயன்படுத்தப்பட்டிருப்பது இது இரண்டாவது முறை ஆகும்.

ஒலியின் வேகத்தை விட பத்து மடங்கு அதிக வேகத்தில் பறக்கும் திறன் கொண்டதாக கூறப்படும் இந்த ஏவுகணையை தடுக்க முடியாது என்று ரஷ்ய ஜனாதிபதி புதின் முன்பே கூறியிருந்தார். இந்த ஏவுகணை அணு குண்டுகளை சுமக்கும் திறன் பெற்றதாக இருந்தாலும், சமீபத்திய தாக்குதலில் பயன்படுத்தப்பட்ட ஏவுகணையில் அணு ஆயுதங்கள் பொருத்தப்பட்டிருந்ததாக எந்த உறுதியான தகவலும் இல்லை.

உக்ரைனில் உள்ள முக்கியமான கட்டமைப்பு வசதிகளை குறிவைத்தே இந்த தாக்குதல் நடத்தப்பட்டதாக ரஷ்ய பாதுகாப்பு அமைச்சகம் தெரிவித்துள்ளது. மேலும், இந்த தாக்குதலின்போது ட்ரோன்கள் மற்றும் மிகத் துல்லியமான நீண்ட தூர நிலம் மற்றும் கடல் வழி ஆயுதங்களும் பயன்படுத்தப்பட்டதாக கூறப்பட்டுள்ளது.

தாக்குதலின் இலக்குகள் முழுமையாக தாக்கப்பட்டுள்ளதாகவும், புதினின் இல்லத்தை குறிவைத்து நடந்ததாக கூறப்படும் தாக்குதலில் பயன்படுத்தப்பட்ட ட்ரோன்களை தயாரித்த தொழிற்சாலை மற்றும் மின்சார வசதிகள் முக்கிய இலக்குகளாக இருந்ததாகவும் அமைச்சகம் விளக்கம் அளித்துள்ளது.

இந்த தாக்குதல் தொடர்பாக ல்விவ் மண்டல ஆளுநர் மாக்சிம் கோசிட்ஸ்கி கருத்து தெரிவித்தபோது, ஒரு முக்கிய கட்டமைப்பு அமைப்பு தாக்கப்பட்டுள்ளதாக கூறினார். உள்ளூர் ஊடகங்கள் வெளியிட்ட தகவல்களின் அடிப்படையில், மிகப்பெரிய எரிவாயு சேமிப்பு வசதிகள் உள்ள ஸ்ட்ரை எரிவாயு களம் இந்த தாக்குதலின் பிரதான இலக்காக இருந்திருக்கலாம் என தெரிவிக்கப்பட்டுள்ளது.

மேற்கு உக்ரைனில் ஒரேஷ்னிக் ஏவுகணை தாக்கிய தருணம் என கூறி, ரஷ்ய போர்செய்தியாளர்கள் காணொளி ஒன்றையும் வெளியிட்டுள்ளனர். பனியால் மூடப்பட்ட நிலப்பரப்பில், தரையில் ஆறு ஒளிரும் வெடிப்புகள் நிகழ்ந்ததையும், அதனைத் தொடர்ந்து பெரும் சத்தத்துடன் தொடர்ச்சியான வெடிப்புகள் ஏற்பட்டதையும் அந்த காணொளியில் காண முடிகிறது. இருப்பினும், அந்த காணொளியின் உண்மைத் தன்மையை உடனடியாக உறுதிப்படுத்த முடியவில்லை என சர்வதேச ஊடகங்கள் தெரிவித்துள்ளன.

டிசம்பர் 29 அன்று நவ்கரோட் மண்டலத்தில் உள்ள புதினின் இல்லத்தை உக்ரைன் ட்ரோன்கள் தாக்க முயன்றதாக ரஷ்யா கூறியதை, உக்ரைன் அரசு முற்றிலும் மறுத்துள்ளது. இது ஏற்கனவே சிக்கலில் உள்ள அமைதி பேச்சுவார்த்தைகளை மேலும் பாதிக்க வேண்டுமென்ற நோக்கில் உருவாக்கப்பட்ட அர்த்தமற்ற பொய் என உக்ரைன் கடுமையாக விமர்சித்துள்ளது.அமெரிக்க ஜனாதிபதி டொனால்ட் ட்ரம்ப் கூட, புதினின் இல்லம் மீது தாக்குதல் நடந்ததாக தான் நம்பவில்லை என்றும், ஆனால் அதற்கு தொடர்பில்லாத வேறு சம்பவம் அருகாமையில் நடந்திருக்கலாம் என்றும் கூறியுள்ளார். இதற்கிடையே, காஸ்பியன் கடலுக்கு அருகே உள்ள கபுஸ்டின் யார் சோதனை தளத்திலிருந்து ஒரேஷ்னிக் ஏவுகணை ஏவப்பட்டதாக உக்ரைன் விமானப்படை அதிகாரப்பூர்வமாக உறுதிப்படுத்தியுள்ளது.